WHO និយាយថា ហានិភ័យនៃការរីករាលដាលនៃមេរោគ Nipah គឺទាប

WHO និយាយថា ហានិភ័យនៃការរីករាលដាលនៃមេរោគ Nipah គឺទាប

អង្គការសុខភាពពិភពលោក (WHO) បាននិយាយនៅថ្ងៃសុក្រ ទី៣០ ខែមេសាថា ហានិភ័យនៃការរីករាលដាលនៃវីរុស Nipah នៅតែទាប ដោយមនុស្ស ១៩០នាក់ ដែលបានប៉ះពាល់ជាមួយអ្នកជំងឺពីរនាក់នៅក្នុងប្រទេសឥណ្ឌា មិនមានលទ្ធផលតេស្តវិជ្ជមាន ឬមានរោគសញ្ញានោះទេ។

ក្នុងសប្តាហ៍នេះ ហុងកុង រួមជាមួយម៉ាឡេស៊ី សិង្ហបុរី ថៃ និងវៀតណាម ស្ថិតក្នុងចំណោមកន្លែងនានានៅអាស៊ី ដែលបានរឹតបន្តឹងការត្រួតពិនិត្យអ្នកដំណើរនៅតាមអាកាសយានដ្ឋាន ដើម្បីទប់ស្កាត់ការរីករាលដាលនៃមេរោគ Nipah បន្ទាប់ពីប្រទេសឥណ្ឌាបានប្រកាសពីការរកឃើញករណីពីរនៅក្នុងប្រទេសរបស់ខ្លួន។

លោកស្រី Anais Legand មន្ត្រីអង្គការសុខភាពពិភពលោក បានប្រាប់សន្និសីទសារព័ត៌មានមួយនៅទីក្រុងហ្សឺណែវថា ហានិភ័យនៃការរីករាលដាលទូទាំងប្រទេស តំបន់ និងពិភពលោកបច្ចុប្បន្នត្រូវបានចាត់ទុកថាទាប ដោយអ្នកឆ្លងពីរនាក់ ដែលមិនធ្លាប់ធ្វើដំណើរពេលឈឺ កំពុងសម្រាកព្យាបាលនៅមន្ទីរពេទ្យ និងនៅរស់រានមានជីវិត និងម្នាក់បង្ហាញសញ្ញានៃការប្រសើរឡើង។

យោងតាមលោក Legand អង្គការសុខភាពពិភពលោកកំពុងរង់ចាំប្រទេសឥណ្ឌាចែករំលែកព័ត៌មានស្តីពីរចនាសម្ព័ន្ធហ្សែនរបស់វីរុស ដើម្បីវាយតម្លៃថាតើវាអាចបានផ្លាស់ប្តូរ ឬវិវត្តបន្ថែមទៀតឬអត់ ប៉ុន្តែនៅពេលនេះមិនទាន់មានភស្តុតាងជាក់លាក់ណាមួយដែលអាចជាមូលហេតុនៃការព្រួយបារម្ភនោះទេ។

វីរុស Nipah ត្រូវបានចម្លងដោយសត្វប្រចៀវ និងសត្វដទៃទៀតដូចជាជ្រូក ហើយអាចចម្លងទៅមនុស្សបាន។

វីរុសនេះបណ្តាលឱ្យមានគ្រុនក្តៅ និងរលាកខួរក្បាល ហើយមានអត្រាមរណភាពចន្លោះពី ៤០% ទៅ ៧៥%។

បច្ចុប្បន្ននេះមិនទាន់មានការព្យាបាលជាក់លាក់ណាមួយសម្រាប់មេរោគ Nipah នៅឡើយទេ ហើយវ៉ាក់សាំងដែលកំពុងស្ថិតក្នុងការអភិវឌ្ឍនៅតែកំពុងត្រូវបានសាកល្បង។