ការនាំចេញសម្លៀកបំពាក់ វាយនភណ្ឌ ស្បែកជើង និងផលិតផលធ្វើដំណើររបស់កម្ពុជា បានកើនឡើងដល់ ១១,៧៦ ប៊ីលានដុល្លារ ពីខែមករា ដល់ខែសីហា ឆ្នាំ២០២៦ ពោលគឺកើនឡើង ៧,២ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ សម្លៀកបំពាក់ និងវាយនភណ្ឌ នាំមុខគេដែលមានទំហំ ៨,៧៨ ប៊ីលានដុល្លារ។ វិស័យនេះបានផ្តល់ការងារដល់កម្មករនិយោជិតប្រមាណ ១,១ លាននាក់ នៅតាមរោងចក្រ និងសាខាជាង ១.៨០០ កន្លែង។
យោងតាមរបាយការណ៍របស់ក្រសួងពាណិជ្ជកម្ម ដែលត្រូវបានសម្រង់ដោយភ្នាក់ងារសារព័ត៌មានស៊ីនហួរ (Xinhua) នៅថ្ងៃទី១២ ខែកញ្ញា ឆ្នាំ២០២៦ បានឱ្យដឹងថា ការនាំចេញសម្លៀកបំពាក់ វាយនភណ្ឌ ស្បែកជើង និងផលិតផលធ្វើដំណើររបស់កម្ពុជា ទទួលបានប្រាក់ចំណូល ១១,៧៦ ប៊ីលានដុល្លារ ក្នុងរយៈពេល ៨ ខែដំបូងនៃឆ្នាំ២០២៦។ តួលេខនេះមានការកើនឡើង ៧,២ ភាគរយ ធៀបនឹងចំនួន ១០,៩៧ ប៊ីលានដុល្លារ ក្នុងរយៈពេលដូចគ្នាកាលពីឆ្នាំមុន។
ការនាំចេញសម្លៀកបំពាក់ និងវាយនភណ្ឌ មានទំហំរហូតដល់ ៨,៧៨ ប៊ីលានដុល្លារ កើនឡើង ៧,៣ ភាគរយ ខណៈការនាំចេញស្បែកជើងកើនឡើង ៧,៥ ភាគរយ ដល់ ១,៥ ប៊ីលានដុល្លារ និងផលិតផលធ្វើដំណើរកើនឡើង ៦,៥ ភាគរយ ដល់ ១,៤៨ ប៊ីលានដុល្លារ។ វិស័យនេះនៅតែជាប្រភពចំណូលរូបិយប័ណ្ណបរទេសដ៏សំខាន់បំផុតរបស់កម្ពុជា ដោយក្តោបក្តាប់រហូតដល់ ៤៨ ភាគរយនៃតម្លៃនាំចេញសរុបនៅក្នុងរបាយការណ៍។
លោក ថោង ម៉េងដាវីដ អនុប្រធានមជ្ឈមណ្ឌលសិក្សាចិន-អាស៊ាន នៃសាកលវិទ្យាល័យបច្ចេកវិទ្យា និងវិទ្យាសាស្ត្រកម្ពុជា បានភ្ជាប់កំណើននេះទៅនឹងការធ្វើពិពិធកម្មទីផ្សារ។ លោកបានបន្ថែមថា ដើម្បីរក្សាសន្ទុះនេះ រោងចក្រនានានៅតែត្រូវការសង្វាក់ផលិតកម្មបៃតងជាងមុន ផលិតផលដែលមានតម្លៃបន្ថែមខ្ពស់ និងប្រព័ន្ធភស្តុភារពាណិជ្ជកម្មឌីជីថលដែលរលូនជាងមុន។
ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា វិស័យផលិតកម្មនេះមានរោងចក្រ និងសាខាជាង ១.៨០០ កន្លែង និងកំពុងផ្តល់ការងារដល់កម្មករនិយោជិតប្រមាណ ១,១ លាននាក់ ដែលភាគច្រើនជាស្ត្រី។ ប្រភព៖ ស៊ីនហួរ ដកស្រង់ចេញពីក្រសួងពាណិជ្ជកម្ម។
0.000 SRY