ប្រាសាទបន្ទាយឆ្មារនៅលើទឹកដីនៃខេត្ដបន្ទាយមានជ័យ
បន្ទាយមានជ័យគឺជាខេត្ដថ្មីនៅលើទឹកដីចាស់សម្បូរទៅដោយសម្បត្ដិវប្បធម៌ និងធនធានធម្មជាតិ ដែលបុព្វបុរសខ្មែរ បានបន្សល់ទុកឲ្យដែលមានរួមទាំងរមណីយដ្ឋាន ទន្លេ បឹងបួ ប្រាង្គប្រាសាទដែលមានពាសពេញដីសម្រាប់ទាក់ទាញភ្ញៀវទេសចរ ។ នៅក្នុងនោះប្រាសាទបន្ទាយឆ្មារក៏ស្ថិតនៅក្នុងទឹកដីនៃខេត្ដបន្ទាយមានជ័យដែរ ដែលត្រូវបានគេចាត់ទុកជារមណីយដ្ឋានវប្បធម៌ប្រវត្ដិសាស្ដ្រ និងជាបេតិកភណ្ឌ សម្បត្ដិវប្បធម៌របស់ពិភពលោកទៀតផង ។ ប្រាសាទបន្ទាយឆ្មារត្រូវបានកសាងឡើងនៅក្នុងរជ្ជកាលព្រះបាទជ័យវរ្ម័នទី៧នាសតវត្សរ៍ទី១២ និងទី១៣ នៃគ្រិស្ដសករាជដើម្បីឧទ្ទិសថ្វាយចំពោះព្រះសិន្ទ្រកុមារបុត្រារបស់ព្រះអង្គព្រមទាំងសេនាស្មោះត្រង់ ៤នាក់ ទៀតដែលបានស្លាប់បាត់បង់ជីវិតនៅលើសមរភូមិ ។
ប្រាសាទបន្ទាយឆ្មារស្ថិតនៅក្នុងភូមិបន្ទាយឆ្មារ ឃុំបន្ទាយឆ្មារ ស្រុកថ្មពួក ដោយមានចម្ងាយ៥៩គីឡូម៉ែត្រ ពីទីរួមខេត្ដបន្ទាយមានជ័យ តាមបណ្ដោយផ្លូវលេខ៦៩ ឆ្លងកាត់ស្រុកសិរីសោភ័ណ្ឌចូលទៅស្រុកថ្មពួកតែម្ដង ។ ប្រាង្គប្រាសាទបន្ទាយឆ្មារបង្កប់ខ្លួននៅក្នុងព្រៃដែលមានដើមឈើខ្ពស់ៗ តែគួរឲ្យអនិច្ចាវាត្រូវបានរងនូវការបំផ្លិចបំផ្លាញយ៉ាងដំណំនៅក្នុងសម័យសង្គ្រាមអំឡុងឆ្នាំ១៩៧៩-១៩៩៩ ហើយផ្នែកខ្លះត្រូវបានឈ្មួញទុច្ចរិតដាប់វាយបំបែកយករូបចម្លាក់ទៅលក់នៅប្រទេសជិតខាង ។ នៅក្បែរបរិវេណប្រាសាទហ៊ុមព័ទ្ធដោយគូទឹកថ្លាឈ្វេងនៅផ្នែកខាងកើត និងខាងត្បូងហើយត្រូវបានអ្នកស្រុកយកមកប្រើប្រាស់ក្នុងជីវភាពប្រចាំថ្ងៃ ។
អវលោកិតេស្វរៈ ត្រូវបានជ្រើសធ្វើជានិមិត្តសញ្ញារបស់ខេត្តបន្ទាយមានជ័យ
ប្រាសាទបន្ទាយឆ្មារមិនត្រឹមតែបង្ហាញពីវប្បធម៌វិស័យសិល្បៈ សំណង់ស្ថាបត្យកម្មប៉ុណ្ណោះទេ តែបានបង្ហាញពីអត្ដសញ្ញាណជាតិការរីកចម្រើនរុងរឿងនាសម័យមហានគរលើគ្រប់វិស័យ ។ ទាំងសម័យអតីតកាល និងសម័យបច្ចុប្បន្នគឺបានទាក់ទាញភ្ញៀវទេសចរលើកស្ទួយជីវភាពប្រជាជនរស់នៅតំបន់នោះ ។ នេះជាមោទនភាពសម្រាប់កូនខ្មែរគ្រប់ជំនាន់ និងដើម្បីឲ្យជាតិសាសន៍ដទៃបានស្គាល់ពីប្រទេសកម្ពុជា ។ លើសពីនេះទៅទៀត ប្រាសាទបន្ទាយឆ្មារត្រូវបានគេចាត់បញ្ចូលទៅក្នុងតំបន់ការពារទេសភាព និងជាសម្បត្ដិបេតិកភណ្ឌពិភពលោកទៀតផង ។ សម្រាប់ខេត្ដបន្ទាយមានជ័យ ក្រៅពីប្រាសាទបន្ទាយឆ្មារនៅមានប្រាសាទជាច្រើនទៀតដែលសរុបទៅមានចំនួន២៤៦ប្រាសាទ ៕
402.095 SRY