រមណីយដ្ឋានក្បាលស្ពាន
រមណីយដ្ឋានប្រវត្តិសាស្ត្រនិងធម្មជាតិ ដែលល្អបំផុតសម្រាប់អ្នកចូលចិត្តដំណើរកម្សាន្តបែបផ្សងព្រេង ។ រមណីយដ្ឋានក្បាលស្ពាន មានទីតាំងស្ថិតនៅចម្ងាយប្រហែល ៥០គីឡូម៉ែត្រពីក្រុងសៀមរាប ។ ដើម្បីទៅដល់កន្លែងដែលមានរូបចម្លាក់ឆ្លាក់នៅបាតស្ទឹង អ្នកត្រូវបន្តដំណើរដោយថ្មើរជើងក្នុងរយៈចម្ងាយ ១៥០០ម៉ែត្រពីជើងភ្នំរហូតដល់លើភ្នំ ។ ពេលទៅដល់ អ្នកនឹងបានឃើញរូបចម្លាក់ជាច្រើន ដូចជា រូបលិង្គ១០០០ រូបព្រះវិស្ណុផ្ទុំកណ្តាលមហាសមុទ្រនាអន្តរកប្ប និងរូបចម្លាក់ផ្សេងៗទៀត ដែលទាក់ទងជាមួយព្រហ្មញ្ញសាសនា ។ ចម្លាក់ទាំងនេះភាគច្រើនសាងឡើងពីសតវត្សទី១១ ដល់ទី១៣ ។
ក្បាលស្ពានត្រូវបានស្ថាបនាឡើងដោយព្រះបាទសូរ្យវរ្ម័នទី១ និងស្ថាបនារួចជាស្ថាពរដោយព្រះបាទឧទ័យទិត្យវរ្ម័នទី២ ។ ដោយសារគេយល់ថា ទឹកដែលហូរតាមទីនេះជាប្រភពនៃការចម្រុងចម្រើន និងត្រជាក់ត្រជុំ ហើយម្យ៉ាងទៀត យកទៅប្រើការក្នុងកសិកម្មផង គេបានឆ្លាក់លិង្គរាប់មិនអស់ ដែលស្នងព្រះឥសូរនៅតាមបាតស្ទឹង ចាប់ពីខាងជើងផែ្នកខាងលើនៃស្ពានថ្មធម្មជាតិ ចុះរហូតដល់ទឹកធ្លាក់ ៕
894.632 SRY