ការដោះដូរទំនិញកម្ពុជាចិន សម្រេចបានទំហំទឹកប្រាក់ ចំនួន ១២,៦ ពាន់លានដុល្លារ កើនឡើង ២៦% នៅក្នុងរយៈពេល ៨ ខែ ឆ្នាំ ២០២៥ ក្នុងនោះ កម្ពុជានាំចេញទៅចិនចំនួនជាង ១ ពាន់លានដុល្លារ ធ្លាក់ចុះ ៨% ចំណែកចិននាំចូលមកវិញមានទំហំ ១១,៦ ពាន់លានដុល្លារ កើនឡើង ៣០%។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា (GDCE)។
នៅរយៈពេល ៨ ខែដំបូងឆ្នាំ ២០២៥ កម្ពុជាបានប្រឈមមុខនឹងឱនភាពពាណិជ្ជកម្មជាមួយប្រទេសចិនជាង ១០.៥ ពាន់លានដុល្លារ។ ទំនិញដែលកម្ពុជានាំចេញទៅចិនភាគច្រើនរួមមានផលិតផលកសិកម្ម គ្រឿងសង្ហារឹម គ្រឿងអលង្ការ និងផលិតផលវាយនភណ្ឌ។ ខណៈដែលទំនិញដែលចិននាំចូលមកកម្ពុជាមានវត្ថុធាតុដើមសម្រាប់រោងចក្រ សម្ភារៈប្រើប្រាស់ប្រចាំថ្ងៃ អាហារ ភេសជ្ជៈ រថយន្ត គ្រឿងម៉ាស៊ីន គ្រឿងសំណង់ និងគ្រឿងអេឡិចត្រូនិក។
លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន បានបញ្ជាក់ថា ការមានឱនភាពពាណិជ្ជកម្មច្រើននេះបណ្តាលមកពីកម្ពុជាចាំបាច់ត្រូវនាំចូលវត្ថុធាតុដើមពីចិនសម្រាប់ផលិតផលដែលនាំចេញទៅអឺរ៉ុប និងអាមេរិក។ ដើម្បីបង្រួញអតិរេកពាណិជ្ជកម្មនេះ លោកបានណែនាំឲ្យកម្ពុជាបង្កើតរោងចក្រដែលអាចផ្គត់ផ្គង់វត្ថុធាតុដើមដោយខ្លួនឯង។
ក្នុងឆ្នាំ ២០២៤ ពាណិជ្ជកម្មទ្វេភាគីរវាងកម្ពុជា និងចិនបានសម្រេចទំហំជាង ១៥.១៨ ពាន់លានដុល្លារ ដែលកើនឡើង ២៣.៨% បើប្រៀបធៀបនឹងឆ្នាំ ២០២៣។ ក្នុងនោះ ការនាំចេញរបស់កម្ពុជាមានតម្លៃ ១.៧៥ ពាន់លានដុល្លារ (កើន ១៨.៤%) ខណៈការនាំចូលពីចិនមានតម្លៃ ១៣.៤៣ ពាន់លានដុល្លារ (កើន ២៤.៦%)។
622.304 SRY