មានជម្លោះនឹងគ្នាអស់ជិត៣០ឆ្នាំ រវ៉ាន់ដានិងសាធារណរដ្ឋប្រជាធិបតេយ្យកុងហ្កោ បានចុះហត្ថលេខាលើកិច្ចព្រមព្រៀងជាប្រវត្តិសាស្ត្រនៅទីក្រុងវ៉ាស៊ីនតោន ក្រោមម្លប់សហរដ្ឋអាម៉េរិក នាយប់ថ្ងៃសុក្រទី២៧មិថុនា២០២៥។ ជំនួបកំពូលអន្តរប្រទេសរវ៉ាន់ដានិងសាធារណរដ្ឋកុងហ្កោ នឹងប្រព្រឹត្តទៅនៅចុងខែកក្កដាខាងមុខ ដោយមានជំនួបថ្នាក់ប្រធានាធិបតីនៃប្រទេសទាំងពីរជាមួយលោកដូណាល់ត្រាំទៀត។ ប្រធានាធិបតីអាមេរិកដូណាល់ត្រាំចាត់ទុកកិច្ចព្រមព្រៀងនេះថាការបើកទំព័រថ្មីនៃក្តីសង្ឃឹម។ ចំណែកប្រធានសហភាពអាហ្វ្រិកយល់ថាកិច្ចព្រមព្រៀងនេះជាការបោះជំហានទៅរកសន្តិភាពសម្រាប់តំបន់ទាំងមូល។
រដ្ឋមន្ត្រីក្រសួងការបរទេសរវ៉ាន់ដានិងសាធារណរដ្ឋប្រជាធិបតេយ្យកុងហ្កោបានចុះហត្ថលេខាលើកិច្ចព្រមព្រៀងសន្តិភាព ជាប្រវត្តិសាស្ត្រ នៅទីក្រុងវ៉ាស៊ីនតោន ក្រោមអធិបតីភាពរបស់លោកប្រមុខការទូតអាម៉េរិក Marco Rubio។ “ជាថ្ងៃដ៏សំខាន់ សម្រាប់ប្រទេសទាំងពីរដែលអាចបិទបញ្ចប់ជម្លោះរ៉ាំរ៉ៃជិត៣០ឆ្នាំ”។ នេះជាប្រសាសន៍របស់លោករដ្ឋមន្ត្រីការបរទេសអាម៉េរិក ដោយសម្តែងអំណរគុណដល់ភាគីបក្សដិបក្សទាំងពីរ ដែលបានប្រឹងជំនះការលំបាកនានាទម្រាំសម្រេចបានកិច្ចព្រមព្រៀងពេលនេះ។
បើតាមរដ្ឋមន្ត្រីក្រសួងការបរទេសរវ៉ាន់ដារ ភាគីទាំងពីរបានសន្យាចាប់ផ្តើមដាក់ឱ្យដំណើរការយន្តការបិទបញ្ចប់ទាំងស្រុង និងដោយមិនអាចកែប្រែបាន ការគាំទ្ររបស់រដ្ឋ (កុងហ្កោ) ក្រុមប្រដាប់អាវុធនៃកងកម្លាំងប្រជាធិបតេយ្យរំដោះរវ៉ាន់ដា ព្រមទាំងក្រុមប្រដាប់អាវុធពាក់ព័ន្ធផ្សេងៗទៀត។ ចំណែករវ៉ាន់ដាដែលបដិសេធជានិច្ចថាមិនបានជួយយោធាM23 នៅខាងកើតនៃសាធារណរដ្ឋកុងហ្កោ ក៏សន្យាលើកវិធានការការពារខ្លួនចេញដែរ បើទោះបីកិច្ចព្រមព្រៀងមិននិយាយដោយចំៗក៏ដោយ។
កិច្ចព្រមព្រៀងក៏មានចែងគម្រោងរំសាយកងកម្លាំងប្រដាប់អាវុធនានា ការពារជនស៊ីវិល ការវិលត្រលប់របស់ជនផ្លាស់ទី ជនភៀសខ្លួន និងយន្តការតាមដានដើម្បីធានាឱ្យមានការគោរពកិច្ចព្រមព្រៀង។ នេះបើតាមការគូសបញ្ជាក់បន្ថែមរបស់លោកស្រីរដ្ឋមន្ត្រីក្រសួងការបរទេសនៃសាធារណរដ្ឋកុងហ្កោ។ នៅខែក្រោយ យន្តការសម្របសម្រួលសន្តិសុខរួម រវ៉ាន់ដាសាធារណរដ្ឋប្រជាធិបតេយ្យកុងហ្កោ នឹងចាប់ដំណើរការ និងចាប់ទទួលបណ្តឹង ឬការតវ៉ាផ្សេងៗទាក់ទងនឹងការរំលោភកិច្ចព្រមព្រៀង។ សហភាពអាហ្វ្រិក អាម៉េរិក កាតា មានចំណែកនៅក្នុងគណៈកម្មការនេះ។
ហេតុអ្វីអាម៉េរិក ប្រឹងប្រែងរកសន្តិភាពក្នុងជម្លោះរវ៉ាន់ដាសាធារណរដ្ឋកុងហ្កោ? លោកប្រធានាធិបតីអាម៉េរិក ដូណាល់ត្រាំ បានចាត់ទុកកិច្ចព្រមព្រៀងសន្តិភាព រវាង រវ៉ាន់ដា-សាធារណរដ្ឋប្រជាធិបតេយ្យកុងហ្កោថា ជាការបើកទំព័រនៃក្តីសង្ឃឹមថ្មី ឱកាសថ្មីសម្រាប់តំបន់ នាំឆ្ពោះទៅរកភាពរុងរឿងនិងសន្តិភាព។ ប៉ុន្តែជាថ្នូរនៃសន្តិភាពនេះ អាម៉េរិក ទំនងជាបានទទួលសិទ្ធិពិសេសក្នុងការគ្រប់គ្រងប្រើប្រាស់ធនធានធម្មជាតិរ៉ែColtan ដ៏ចាំបាច់សម្រាប់ឧស្សាហកម្មអេឡិចត្រូនិក ទើបលោកត្រាំចាប់អារម្មណ៍ខ្លាំង។ តំបន់ភាគខាងកើតប្រទេសសាធារណរដ្ឋកុងហ្កោជាប់ព្រំប្រទល់នឹងរវ៉ាន់ដារ និងជាតំបន់មានជម្លោះហិង្សារ៉ាំរ៉ៃជាង៣០ឆ្នាំនេះ មានកប់រ៉ែកុលតង់ដល់ទៅជាង៦០%នៃធនធាននៅលើផែនដី៕
759.259 SRY